Bilang pakiki-isa...

Ngayun, hanggang linggo, ang Global Stand Up Against Poverty. Ang akward nga lang na may sale din sa Megamall sa mga panahong ito.

Bagama't walang direktang pagbanggit, palaga'y ko'y may kinalaman pa rin ito sa tema. Di ba, Mr. C? Kaya bilang pakiki-isa, isang salin mula kay Soliman Santos.*

Mga apulitikal na intelektwal*

Isang araw
ang mga apulitikal
na intelektwal
ng aking bansa
ay uusigin
ng pinakapayak
sa mga mamamayan.

Tatanungin sila
kung ano ang ginawa nila
habang ang kanilang bansa’y naghihingalo
nang dahan-dahan,
tulad ng matamis na apoy
mumunti at nangungulila.

Walang magtatanong sa kanila
tungkol sa kanilang magagarang damit,
sa mahahaba nilang siyesta
matapos ang tanghalian,
walang magnanais makaalam
tungkol sa kanilang malinis na pakikitunggali
sa “ang ideya
ng wala”
walang makikialam tungkol
sa kanilang kalaamang pampinasiya.

Hindi sila tatanungin
tungkol sa mitolohiyang Griyego,
o tungkol sa kanilang pagkamuhi sa sarili
kapag ang isa sa kanila
ay nagsimulang mamatay
sa duwag na paraan.

Hindi sila tatangungin
tungkol sa kanilang absurdong
mga pagbibigay-katwiran,
isinilang sa anino
ng buong kasinungalingan.

Sa araw na iyon
darating ang simpleng mga tao.

Silang mga walang lugar
sa mga aklat at mga tula
ng apulitikal na mga intelektwal,
pero araw-araw na naghahatid
ng tinapay at gatas,
tortilya at itlog,
silang mga nagmamaneho ng kanilang kotse,
silang nag-alaga ng kanilang aso’t mga hardin
at nagtrabaho para sa kanila,
at itatanong nila:

“Ano ang inyong ginawa nang ang mga dukha
ay nagdusa, nang ang pagkalinga
at buhay
ay tumakas mula sa kanila?”

Apulitikal na mga intelektwal
ng mahal kong bansa,
hindi kayo makasasagot.

Isang buwitre ng katahimikan
ang sasakmal sa inyong bituka.

Ang sarili ninyong kalungkutan
ay uuk-ok sa inyong kaluluwa.

At mapipipi kayo sa inyong kahihiyan

Si Soliman Santos ay makatang taga-Bulacan. Ilan sa mga katha nya'y makikita sa Likhaan, at ilang publikasyon ng Ibon. Nagsusulat din sya para sa Pinoy Weekly.

Si Otto Rene Castillo ay makatang Guatemalan at naging taga-pangulo sa Propaganda at Edukasyon ng Rebel Armed Forces.

kinuha ang larawan sa http://www.marxists.org/subject/art/literature/castillo/photo/castillo1.gif